ڀاڳ ڀري (Putrajiva Roseburghi ):هي پسارکو وکر آهي، جنهن کي اردو ۽ هنديءَ ۾ جياپوتا، گجراتيءَ ۾ پتر جيوڪ چوندا آهن. وچولي قد جو هي سدا بهار وڻ، هنگوٽ جي وڻ وانگر ٿيندو آهي. ان جون ٽاريون بڊيل ۽ پن ڪاراڻ مائل ساوا ٿيندا آهن. هي وڻ ننڍن ڇڳن جي صورت ۾ گل ڪندو آهي. جيڪي جُون مهيني ڌاري نمورين وانگر ٿيندا آهن. هيءَ اڪثر اُتر پرديش ۽ پنجاب ۾ ٿئي ٿو. هن جي ٻجن جي مالها ٺاهي پوڄا پاٺ مهل پائيندا آهن. آڳاٽي زماني ۾ ويد هن جا ٻج سنڍ زالن ۽ مردن کي انهيءَ خيال کان استعمال ڪرائيندا هئا ته انهن جو مغز کائڻ سان اولاد ٿئي ٿو. انهيءَ نسبت سان سنڌيءَ ۾ هن جو نالو ”ڀاڳ ڀري“ رکيو ويو. ساڌو لوڪ هن جي گُلن جون مالهائون پائيندا آهن. سندن عقيدو آهي ته انهن کي پائڻ سان هو بيمارين کان محفوظ رهندا.